اختبار الندالة

لو عايز تبقي ندل وتنضم لنادي النداله الدولي ..... الفرصه جاتلك ؟!
كل اللي عليك انك تحل الامتحان ده
وده عباره عن 7 مواقف لو عملتهم تستلم عضويتك في نادي النداله ...
ولو عايز تبقي سوبر ندل قوللي انك عملت المواقف دي وابعتلك الجزء التاني من الامتحان فورا
الموقف الاول ( في السرفيس )
حضرتك راكب وطبعا فى محطات بيبقى السرفيس زحمة جداااااا
بتعمل انت ابن البلد الشهم وتمسك الباب لاى واحد جاى علشان يركب
و اول ميبقى خلاص هيركب تقوم سايب الباب يقفل
الموقف التاني ( في العزاء )
لو انت وواحد صاحبك فى عزاء اعمل اى حاجة تخليه يضحك
و اول ما يضحك أعمل فيها الشاب الهمام و قوله متخلى عندك دم يا أخى
ويا سلام بئا لو تكون بصوت عالى
الموقف الثالث ( مع اصحابك )
لو صاحبك غلبان اوى وملوش فى اى حاجة وانتوا ماشيين فى الشارع زقه على اى بنت
وبعدين زعق له وقوله برضه مش هتبطل قلة الادب دى قلت لك مليون مرة وانا ماشى معاك ماتعاكسش بنات
طبعا البنت هتديله باللى فى رجلها
و انت تسيبه وتخلع لان اول ما هى هتديله باللى فى رجلها الشعب كله هيبقى فى اللحظة دى ابن بلد
وهياكل علقة مكلهاش حرامى غسيل
الموقف الرابع ( في السرفيس برده )
و انت راكب مع اصحابك ويطلب التباع الاجره اطلع في دور الرجوله وقول ( خلاص علي يارجاله )
وتطلع جنيه وتقول للتباع "" واحد "" ومتنساش تاخذ الباقي
الموقف الخامس ( في النت )
لو اتعرفت على مجموعة ناس عن طريق النت وحبوا انهم يشوفوا سحنة حضرتك اتفق معاهم على الميعاد والمكان
ويا سلام لو تختار مكان مفيهوش اى حته ظل والشمس تاكلهم
وتديهم بومبة وتفلسع وماتروحش
الموقف السادس ( في المترو )
و انت راكب المترو عادى زى مخاليق ربنا
لاقيت واحدة شكلها تعبانة وعمالة ترسم على اى كرسى االــ يعنى تعبانة بجد وعايزة تقعد
المهم واحد عمل فيها ابن البلد الشهم و قالها اتفضلى يا ماما
رحت حضرتك زى البراشوت راشق على الكرسى
(( أمال بيطالبوا بالمساواة أزاى ))

يارب يكون الموضوع عجبكوا